काठमाडौँ । निर्वाचन आयोगले प्रतिनिधिसभा सदस्य निर्वाचनको समानुपातिकतर्फको अन्तिम सिट बाँडफाँट औपचारिक रूपमा टुंग्याएको छ। आयोगका प्रवक्ता नारायणप्रसाद भट्टराईले बिहीबार एक विज्ञप्ति जारी गर्दै प्रतिनिधिसभाको ११० समानुपातिक सिटमध्ये ३ प्रतिशतको ‘थ्रेसहोल्ड’ कटाउन सफल ६ वटा राष्ट्रिय दलहरूलाई प्राप्त हुने सांसद संख्या सार्वजनिक गरेका हुन्।

आयोगको आधिकारिक तथ्यांकअनुसार राष्ट्रिय स्वतन्त्र पार्टी (रास्वपा) ले सर्वाधिक ५७ सिट प्राप्त गरेको छ भने नेपाली कांग्रेसले २० सिट, नेकपा (एमाले) ले १६ सिट, नेपाली कम्युनिष्ट पार्टी (नेकपा) ले ९ सिट, तथा श्रम संस्कृति पार्टी र राष्ट्रिय प्रजातन्त्र पार्टी (राप्रपा) ले समान ४/४ सिट प्राप्त गरेका छन्। यस नतिजाले प्रतिनिधिसभामा नयाँ शक्ति समीकरणको स्पष्ट संकेत गरेको छ।

सिट संख्या यकिन भएसँगै निर्वाचन आयोगले सम्बन्धित दलहरूलाई आवश्यक निर्देशन पनि दिएको छ। आयोगले दलहरूलाई तीन दिनभित्र आफ्नो बन्दसूचीमा रहेका नामहरूमध्येबाट समावेशी सिद्धान्त तथा कानुनी प्रावधानहरू पालना गर्दै उम्मेदवार सिफारिस गरी पेस गर्न पत्राचार गरिसकेको छ।

दलहरूबाट नामावली प्राप्त भएपछि आयोगले त्यसलाई रुजु गर्नेछ। सम्पूर्ण प्रक्रिया पूरा भइसकेपछि प्रतिनिधिसभाका लागि निर्वाचित हुने समानुपातिक सांसदहरूको अन्तिम नामावली आयोगले प्रकाशन गर्नेछ, जसले नयाँ संसद् गठनको बाटो थप प्रशस्त गर्नेछ।

दलगत सिट बाँडफाँट तालिका