काठमाडौँ । नेपाल सरकार शिक्षा, विज्ञान तथा प्रविधि मन्त्रालयले विभिन्न विश्वविद्यालयका उपकुलपति छनोट तथा सिफारिससम्बन्धी एकीकृत कार्यविधि, २०८३ अनुसार प्राप्त आवेदनहरूको आधिकारिक विवरण सार्वजनिक गरेको छ। बुधबार मन्त्रालयले जारी गरेको सूचनाअनुसार अनलाइन माध्यमबाट उपकुलपति पदका लागि कुल २१८ वटा आवेदन प्राप्त भएका छन्। खुला प्रतिस्पर्धा र एकीकृत कार्यविधि ल्याइएपछि प्राज्ञिक क्षेत्रका प्रतिष्ठित व्यक्तित्वहरूले डिजिटल माध्यमबाट उत्साहजनक रूपमा आवेदन दिएका हुन्।
प्राप्त विवरणअनुसार देशकै सबैभन्दा पुरानो र ठुलो त्रिभुवन विश्वविद्यालय (त्रिवि) को उपकुलपति बन्न सबैभन्दा बढी ५० जनाले आवेदन दर्ता गराएका छन्। त्यसैगरी पूर्वाञ्चल विश्वविद्यालय र पोखरा विश्वविद्यालयको नेतृत्व सम्हाल्नका लागि समान ३८/३८ वटा आवेदन परेका छन्। उच्च शिक्षाको प्रशासनिक र प्राज्ञिक सुधारका लागि यस पटक कार्यविधि नै परिमार्जन गरिएकाले योग्य उम्मेदवारहरूको आकर्षण बढेको मन्त्रालयको दाबी छ।
अन्य विश्वविद्यालयहरूतर्फ मध्यपश्चिम विश्वविद्यालयमा २०, सुदूरपश्चिम विश्वविद्यालयमा १९, कृषि तथा वन विज्ञान विश्वविद्यालयमा १५ र लुम्बिनी बौद्ध विश्वविद्यालयमा ११ वटा आवेदन संकलन भएको छ। यस्तै मधेश प्रदेशको राजर्षि जनक विश्वविद्यालयका लागि २७ जनाको आवेदन परेको मन्त्रालयले जनाएको छ। आवेदन प्रक्रिया सफलतापूर्वक सम्पन्न भएसँगै अब मन्त्रालयले गठन गरेको सिफारिस समितिले कार्यविधिअनुसार सर्टलिस्टिङ, प्रस्तुतीकरण र अन्तर्वार्ताको अर्को चरणको प्रक्रिया तत्काल अगाडि बढाउने तयारी गरेको छ।
