काठमाडौँ । सभामुख डोलप्रसाद अर्यालले श्रम संस्कृति पार्टीका सांसदहरूलाई संसद्मा आफ्नो व्यवहार र क्रियाकलाप सच्याउन कडा चेतावनी दिएका छन्। बुधबार बसेको प्रतिनिधि सभा बैठकको मर्यादा विपरीत सदनभित्रै प्लेकार्ड देखाएर विरोध प्रदर्शन गरेपछि सभामुख अर्यालले उनीहरूलाई सचेत गराएका हुन्। उनले प्रतिनिधि सभा नियमावलीको नियम ३० बमोजिम सांसदहरूलाई तत्काल आफ्नो व्यवहार सुधार्न र संसद्को गरिमाको ख्याल गर्न निर्देशन दिए।
सभामुखको चेतावनी लगत्तै श्रम संस्कृति पार्टीका अध्यक्ष एवं सांसद हर्कराज राईले नियमावलीको विषयलाई लिएर संसद्मै प्रतिवाद गरेका थिए। उनले सभामुख अर्याललाई नियमावलीको नियम १५ को व्यवस्था र नियम पालना गराउनुभयो कि भएन भन्दै उल्टै प्रश्न गरेका थिए। नियम १५ को परिधिभित्र रहेर आफूहरूले आवाज उठाएको सङ्केत गर्दै राईले सभामुखको चेतावनीप्रति असन्तुष्टि जनाएपछि बैठकमा केही बेर भनाभनको स्थिति सिर्जना भएको थियो।
संसदीय अभ्यासमा प्लेकार्ड र ब्यानर प्रदर्शन गर्न नपाइने स्थापित नियम रहे पनि नयाँ दल र नेताहरूले आफ्ना माग सम्बोधन गराउन फरक शैली अपनाउँदा सदनमा बारम्बार यस्ता दृश्यहरू देखिन थालेका छन्। सभामुख अर्यालले नियमावली विपरितका कार्यहरू जारी रहेमा आगामी बैठकहरूमा थप कडा कानुनी कदम चाल्न आफू बाध्य हुने संकेत समेत गरेका छन्।
