काठमाडौँ । विभिन्न सञ्चारमाध्यमका कार्यालय परिसर बाहिर शङ्कास्पद रूपमा सवारीसाधन पार्किङ गरिएको घटनाप्रति राष्ट्रिय स्वतन्त्र पार्टी (रास्वपा) ले गम्भीर आपत्ति जनाएको छ। सञ्चारगृह र पत्रकारहरूलाई मनोवैज्ञानिक दबाब दिने उद्देश्यले गरिएका यस्ता गतिविधिहरू पूर्णतया लोकतान्त्रिक मूल्य र मान्यताविपरीत रहेको रास्वपाले ठहर गरेको छ।
सोमबार एक औपचारिक विज्ञप्ति जारी गर्दै पार्टीले राज्यको चौथो अङ्गका रूपमा रहेको प्रेस जगत्ले निर्भीक भएर काम गर्न पाउने वातावरणको सुनिश्चितता हुनुपर्नेमा जोड दिएको छ। प्रेस स्वतन्त्रता हनन गर्ने, सञ्चारमाध्यममा त्रास फैलाउने र स्वतन्त्र पत्रकारितालाई सङ्कुचित पार्ने कुनै पनि प्रकारका गतिविधिहरू आफूलाई मान्य नहुने रास्वपाको भनाइ छ।
लोकतन्त्रको प्रमुख आधार नै स्वतन्त्र र भयरहित पत्रकारिता भएको स्मरण गराउँदै रास्वपाले यस घटनाको तत्काल सत्यतथ्य र निष्पक्ष छानबिन गर्न माग गरेको छ। सञ्चारमाध्यमको भौतिक तथा मनोवैज्ञानिक सुरक्षाको प्रत्याभूति गराउन र यस घटनामा संलग्न व्यक्तिहरूको पहिचान गरी कानुनबमोजिम कडा कारबाही गर्न नेपाल सरकार, गृह मन्त्रालय र सम्बन्धित सुरक्षा निकायको गम्भीर ध्यानाकर्षण गराइएको छ।
कुनै पनि दबाब वा त्रासमा नपरी तथ्यमा आधारित स्वतन्त्र पत्रकारितालाई निरन्तरता दिन सञ्चारकर्मीहरूलाई आग्रह गर्दै, पार्टी सदैव पूर्ण प्रेस स्वतन्त्रता र सञ्चारकर्मीको सुरक्षाको पक्षमा दृढतापूर्वक उभिने प्रतिबद्धतासमेत रास्वपाले व्यक्त गरेको छ।
