काठमाडौँ । प्रतिनिधि सभाको बैठकमा सांसदहरूको उपस्थिति घट्दै गएको र बैठक सुरु भएपछि बिचमै बाहिरिने प्रवृत्ति बढेको भन्दै राष्ट्रिय स्वतन्त्र पार्टी (रास्वपा) ले आफ्ना सांसदहरूको हाजिरी विश्लेषण गर्ने निर्णय गरेको छ। संसद्को गरिमा, उत्तरदायित्व र प्रभावकारिता कायम राख्न तथा सांसदहरूलाई जनताप्रति बढी जिम्मेवार बनाउन संसदीय दलले यो कदम चालेको हो।
रास्वपा संसदीय दलका मुख्य सचेतक कविन्द्र बुर्लाकोटीका अनुसार २०८३ असार ३० र ३१ गतेका साथै साउन १४, १८ र २२ गते बसेका संसद् बैठकहरूमा आफ्ना सांसदहरूको उपस्थिति कस्तो थियो भन्नेबारे संसद् सचिवालयबाट आधिकारिक विवरण झिकाएर गहन अध्ययन गरिनेछ।
सांसदहरूको हाजिरी र बैठकमा बस्ने अवधिको सुक्ष्म अध्ययन गरी प्रतिवेदन तयार पार्ने जिम्मेवारी संसदीय दलका सचेतकद्वय प्रकाशचन्द्र परियार र क्रान्तिशिखा धिताललाई दिइएको छ। उनीहरूलाई ७ दिनभित्र अध्ययन प्रतिवेदन बुझाउने कार्यदेश दिइएको छ। मुख्य सचेतक बुर्लाकोटीका अनुसार छानबिन समितिले बुझाएको प्रतिवेदनका आधारमा संसदीय दलको बैठक बसेर अनुपस्थित हुने वा बिचमै हिँड्ने सांसदहरूका सम्बन्धमा आवश्यक निर्णय लिइनेछ।
