काठमाडौँ । नेपालमा हाल पश्चिमी वायुको आंशिक प्रभाव रहे पनि यो प्रणाली बिस्तारै कमजोर बन्दै गएको छ। मौसम पूर्वानुमान महाशाखाका अनुसार पश्चिमी न्यूनचापीय प्रणाली कमजोर भएकाले तत्काल देशका कुनै पनि स्थानमा वर्षा र हिमपातको सम्भावना नरहेको मौसमविद्हरूले बताएका छन्।
हाल देशको हिमाली भू-भागमा साधारणतया बादल लागेको छ भने पहाडी भेगमा आंशिक बदलीको अवस्था छ। तराईका केही स्थानहरूमा भने बिहानीपखदेखि नै तुवाँलो लागेको छ। आज दिउँसो र राति देशका पहाडी तथा हिमाली भू-भागमा मौसम मुख्यतया सफा रहने महाशाखाको पूर्वानुमान छ।
यद्यपि, तराईका धेरै स्थानहरूमा आज दिउँसो पनि हुस्सु र कुहिरो लाग्ने सम्भावना छ। हुस्सुका कारण तराईको जनजीवन र यातायातमा केही प्रभाव पर्न सक्ने देखिएको छ। पहाडी र हिमाली क्षेत्रमा भने मौसम सफा भएसँगै घाम लाग्ने र जनजीवन सामान्य रहने देखिएको छ।
