काठमाडाैं । हाल नेपालमा पश्चिमी वायुको कमजोर प्रभाव रहेकाले देशको मौसममा आंशिक परिवर्तन देखिएको छ।
जल तथा मौसम विज्ञान विभाग, मौसम पूर्वानुमान महाशाखाका अनुसार हाल सुदूरपश्चिम र कर्णाली प्रदेश लगायत देशका उच्च पहाडी तथा हिमाली क्षेत्रहरूमा सामान्यतया बादल लागेको छ भने तराईका भूभागमा तुवाँलोको प्रभाव देखिएको छ।
आज दिउँसो तराईका केही स्थानहरूमा मध्याह्नसम्म हुस्सु र कुहिरो लाग्ने सम्भावना छ। उच्च पहाडी र हिमाली भूभागमा सामान्य बदली रहने तथा बाँकी पहाडी क्षेत्रमा आंशिक बदली हुने देखिएको छ। यसैबीच, कोशी, बागमती, गण्डकी र कर्णाली प्रदेशका उच्च पहाडी तथा हिमाली भूभागका एक-दुई स्थानमा हल्का वर्षासँगै हिमपात हुन सक्ने महाशाखाले जनाएको छ।
आज राति पनि कोशी, गण्डकी र कर्णाली प्रदेशका उच्च हिमाली क्षेत्रमा हल्का वर्षा र हिमपातको क्रम जारी रहने पूर्वानुमान गरिएको छ। रातिको समयमा तराईका थोरै स्थानहरूमा तुवाँलो लाग्ने भए तापनि देशका अन्य भूभागको मौसम भने मुख्यतया सफा रहनेछ। हिमपात र कुहिरोका कारण हुनसक्ने चिसोबाट बच्न र आवश्यक सतर्कता अपनाउन महाशाखाले सबैमा अनुरोध गरेको छ।
