काठमाडौँ । जल तथा मौसम पूर्वानुमान महाशाखाका अनुसार मंगलबार देशका हिमाली र पहाडी भू-भागका साथै कोशी प्रदेशको तराई क्षेत्रमा साधारणतया बदली रहनेछ। मधेश प्रदेशसहित बागमती र गण्डकी प्रदेशको तराई क्षेत्रमा आंशिक बादल लाग्ने भए तापनि लुम्बिनी र सुदूरपश्चिम प्रदेशको तराई भू-भागमा भने मौसम मुख्यतया सफा रहने देखिन्छ।
महाशाखाका अनुसार आज दिउँसो कोशी, बागमती र गण्डकी प्रदेशका हिमाली तथा पहाडी भू-भागका थोरै स्थानहरूमा मेघगर्जन र चट्याङ्गसहित मध्यमसम्मको वर्षा र हिमपातको सम्भावना छ। साथै लुम्बिनी, कर्णाली र सुदूरपश्चिम प्रदेशका हिमाली तथा पहाडी भू-भागका एक-दुई स्थानमा पनि हल्कादेखि मध्यम वर्षा र हिमपात हुन सक्नेछ। तराई क्षेत्रको हकमा कोशी प्रदेशका थोरै स्थान र मधेश, बागमती तथा गण्डकी प्रदेशका तराईका एक-दुई स्थानमा मेघगर्जन र चट्याङ्गसहित पानी पर्ने अनुमान गरिएको छ। यद्यपि, पश्चिम नेपालमा गर्मीको प्रकोप कायमै रहने देखिन्छ; लुम्बिनी र सुदूरपश्चिमको तराईका केही स्थानमा तातो लहर (लू) चल्ने तथा बागमती र गण्डकी प्रदेशका तराई क्षेत्रमा समेत तातो दिन हुने सम्भावना छ।
रातिको समयमा पनि कोशी, बागमती र गण्डकी प्रदेशका हिमाली तथा पहाडी भू-भागका साथै कोशीको तराई क्षेत्रमा साधारणतया बादल लागिरहनेछ। मधेश प्रदेश, लुम्बिनी, कर्णाली र सुदूरपश्चिमको पहाडी क्षेत्र तथा बागमती र गण्डकीको तराईमा आंशिक बदली हुनेछ भने लुम्बिनी र सुदूरपश्चिमको तराईमा मौसम मुख्यतया सफा रहनेछ। राति कोशी प्रदेशको हिमाली र पहाडी भू-भागका केही स्थानमा तथा बागमती र गण्डकीका थोरै स्थानमा चट्याङ्गसहित मध्यमसम्मको वर्षा र हिमपातको सम्भावना छ। यसका साथै कोशीको तराईका थोरै स्थान र मधेशको तराईका एक-दुई स्थानमा पनि मेघगर्जनसहित मध्यम वर्षा हुन सक्ने महाशाखाले जनाएको छ।
