काठमाडौँ । जल तथा मौसम पूर्वानुमान महाशाखाका अनुसार बिहीबार देशभर आंशिकदेखि साधारणतया बदली रही मनसुनी वायुको प्रभाव कायमै रहनेछ। देशका धेरैजसो भू-भागमा मेघगर्जन र चट्याङ्गसहित वर्षा हुनुका साथै केही प्रदेशमा भारी वर्षाको समेत सम्भावना रहेको छ।
आज दिउँसो देशभर साधारणतया बादल लाग्नेछ। देशका पहाडी तथा हिमाली भू-भागका केही स्थानहरूमा मेघगर्जन र चट्याङ्गसहित मध्यम वर्षा र उच्च हिमाली भेगमा हिमपातको सम्भावना रहेको छ। त्यस्तै, कोशी, लुम्बिनी र सुदूरपश्चिम प्रदेशका तराईका थोरै स्थान तथा मधेश, बागमती र गण्डकी प्रदेशको तराई क्षेत्रका एक-दुई स्थानमा मध्यम वर्षा हुनेछ। दिउँसो कोशी, बागमती, गण्डकी र सुदूरपश्चिम प्रदेशका पहाडी तथा तराई भू-भागका एक-दुई स्थानमा भारी वर्षाको समेत सम्भावना रहेकाले सतर्कता अपनाउन महाशाखाले अनुरोध गरेको छ।
रातिको समयमा पनि देशभर साधारणतया बादल लाग्नेछ। देशका हिमाली भू-भागका थोरै स्थानमा मेघगर्जन र चट्याङ्गसहित मध्यम वर्षा तथा हिमपातको पूर्वानुमान गरिएको छ। मधेश प्रदेशका साथै कोशी, बागमती, गण्डकी र लुम्बिनी प्रदेशका पहाडी तथा तराई भू-भागका केही स्थानमा मध्यम वर्षाको सम्भावना छ। साथै कर्णाली र सुदूरपश्चिमको पहाडी क्षेत्र तथा सुदूरपश्चिमको तराईका थोरै स्थानहरूमा पनि चट्याङ्गसहित वर्षा हुनेछ। राति मधेश प्रदेशका साथै कोशी, बागमती र गण्डकी प्रदेशको पहाडी तथा तराई भू-भागका एक-दुई स्थानमा भारी वर्षाको सम्भावना रहेकाले नदी तटीय क्षेत्र र भिरालो जमिन आसपासका बासिन्दालाई सजग रहन आग्रह गरिएको छ।
