काठमाडौँ । देशका विभिन्न भू-भागमा मनसुनी वायुको प्रभाव कायमै रहँदा आइतबार पनि हिमाली तथा पहाडी भेगमा वर्षा र हिमपातको सम्भावना रहेको छ। जल तथा मौसम विज्ञान विभागको मौसम पूर्वानुमान अनुसार आइतबार दिउँसो देशको हिमाली र पहाडी भू-भागमा साधारणतया बादल लाग्नेछ भने तराई भू-भागमा आंशिक बदली रहनेछ।
दिउँसो देशका हिमाली र पहाडी भू-भागका केही स्थानमा मेघगर्जन र चट्याङ्गसहित हल्कादेखि मध्यम वर्षा तथा उच्च हिमाली क्षेत्रमा हिमपातको सम्भावना रहेको छ। तराई क्षेत्रतर्फ कोशी र सुदूरपश्चिम प्रदेशका तराईका थोरै स्थानहरूमा तथा मधेस, बागमती, गण्डकी र लुम्बिनी प्रदेशका तराई भू-भागका एक-दुई स्थानमा मेघगर्जन र चट्याङ्गसहित मध्यम वर्षा हुने पूर्वानुमान गरिएको छ।
रातिको समयमा देशभर साधारणतया बादल लाग्नेछ। राति विशेषगरी कोशी, बागमती र गण्डकी प्रदेशका पहाडी तथा हिमाली भू-भागका एक-दुई स्थानमा भारी वर्षाको सम्भावना रहेको छ।
यसै गरी, राति कोशी, बागमती र गण्डकी प्रदेशका हिमाली र पहाडी भू-भागका केही स्थानमा तथा लुम्बिनी, कर्णाली र सुदूरपश्चिम प्रदेशका हिमाली र पहाडी क्षेत्रका थोरै स्थानमा मध्यम वर्षा र हिमपातको सम्भावना छ। तराईतर्फ बागमती र गण्डकीका थोरै स्थान तथा कोशी, मधेस, लुम्बिनी र सुदूरपश्चिमका एक-दुई स्थानमा मध्यम वर्षा हुन सक्नेछ। पहाडी तथा हिमाली भेगमा भारी वर्षाको जोखिम रहेकाले आवश्यक पूर्वतयारी र सतर्कता अपनाउन सर्वसाधारणलाई आग्रह गरिएको छ।
