काठमाडौँ । मुलुकभर मनसुनी वायुको प्रभाव कायमै रहँदा आज (बिहीबार) देशभरको मौसममा उल्लेख्य बदलाब आउने जल तथा मौसम विज्ञान विभागले जनाएको छ। देशभर साधारणतया बादल लाग्नेछ भने पहाडी तथा तराईका धेरैजसो क्षेत्रमा वर्षा र हिमाली भू-भागमा हिमपातको सम्भावना रहेको छ।
आज दिउँसो देशका हिमाली भू-भागका केही स्थानमा मध्यमसम्मको वर्षा तथा हिमपात हुनेछ। पहाडी भू-भागका धेरै स्थानमा र तराईका केही स्थानहरूमा मेघगर्जन र चट्याङ्गसहित मध्यम वर्षाको सम्भावना छ। विशेष गरी कोशी, बागमती, गण्डकी, कर्णाली र सुदूरपश्चिम प्रदेशका पहाडी भू-भागका साथै लुम्बिनी प्रदेशका पहाडी र तराई भू-भागका एक-दुई स्थानमा भारी वर्षाको सम्भावना रहेकाले आवश्यक सतर्कता अपनाउन मौसमविद्हरूले आग्रह गरेका छन्।
त्यसैगरी आज राति पनि देशभरको मौसम बदली नै रहनेछ। रातिको समयमा देशका हिमाली र पहाडी भू-भागका केही स्थानमा मध्यमसम्मको वर्षा तथा हिमपातको सम्भावना छ भने तराई भू-भागका थोरै स्थानमा मध्यम वर्षा हुने पूर्वानुमान गरिएको छ।
रातिको समयमा कोशी प्रदेशको पहाडी भू-भागका एक-दुई स्थानमा भारी वर्षाको सम्भावना रहेको छ। लगातारको वर्षाका कारण गेग्रान बहाव, बाढी, पहिरो तथा डुबानको खतरा रहने भएकाले नदी तटीय क्षेत्र तथा पहिरोग्रस्त इलाकाका बासिन्दालाई विशेष सचेत रहन अपिल गरिएको छ।
