काठमाडौँ । विगत केही दिनदेखि तुवाँलोको चपेटामा परेको नेपालको मौसममा अब क्रमिक सुधार आउने संकेत देखिएको छ। जल तथा मौसम विज्ञान विभाग, मौसम पूर्वानुमान महाशाखाका अनुसार हाल नेपालमा पश्चिमी न्यून चापीय प्रणाली, उपल्लो वायुमण्डलमा रहेको उच्च चापीय प्रणाली र पूर्वी भू-भाग नजिक रहेको न्यून चापीय क्षेत्रको आंशिक प्रभाव रहेको छ।
मौसमको वर्तमान अवस्था
हाल कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली भू-भागमा साधारणतया बादल लागेको छ। कोशी, बागमती र गण्डकी प्रदेशका केही स्थानमा मेघगर्जन, चट्याङ र हावाहुरीसहित वर्षा भइरहेको महाशाखाले जनाएको छ।
शुक्रबार (आज) कोशी प्रदेशलगायत देशका पहाडी र हिमाली भू-भागमा साधारणतया बदली रहनेछ भने बाँकी भू-भागमा आंशिक बदली रहनेछ। कोशी, बागमती, गण्डकी र लुम्बिनी प्रदेशका पहाडी तथा हिमाली क्षेत्रका थोरै स्थान र मधेस प्रदेशका तराईका केही स्थानमा मेघगर्जन र चट्याङसहित हल्का वर्षा तथा हिमपातको सम्भावना रहेको छ।
किन थियो तुवाँलो?
लामो समयसम्म उपल्लो वायुमण्डलमा उच्च चापीय प्रणाली स्थिर रहनु र पश्चिमी प्रणाली सक्रिय हुन नसक्दा प्रदुषण वायुमण्डलको तल्लो तहमै थुप्रिएर देशभर तुवाँलो लागेको थियो। तर, बिहीबारदेखि वायुमण्डलमा मौसमी गतिविधि बढ्न थालेकाले तुवाँलो क्रमिक रूपमा हट्ने र मौसममा सुधार आउने महाशाखाले जनाएको छ।
