काठमाडौँ । सार्वजनिक खरिद अनुगमन कार्यालयले सम्झौता अनुसारको जिम्मेवारी पूरा नगर्ने थप ८ निर्माण व्यवसायी तथा आपूर्तिकर्ताहरूलाई कालोसूचीमा राखेको छ। कार्यालयले मंगलबार (२०८३ माघ २९ गते) एक सार्वजनिक सूचना जारी गर्दै विभिन्न सरकारी निकायहरूको सिफारिसमा ती कम्पनीहरूलाई कालोसूचीमा राखिएको जानकारी दिएको हो। सार्वजनिक खरिद ऐन, २०६३ को दफा ६३ को उपदफा (१) बमोजिम यो निर्णय गरिएको हो।
सूचना अनुसार कालोसूचीमा पर्नेहरूमा नागार्जुन/आशिका जे.भी., नागार्जुन-मजदुर जे.भी. र मैनाचुली निर्माण सेवा लगायतका कम्पनीहरू रहेका छन्। यीमध्ये कतिपयलाई डेढ वर्ष (१ वर्ष ६ महिना) र कतिपयलाई एक वर्षका लागि कालोसूचीमा राखिएको छ। नेपाली सेनाको वीरेन्द्र अस्पताल, सडक डिभिजन ललितपुर, र पुष्पलाल (मध्यपहाडी) राजमार्ग योजना कार्यालय लगायतका निकायको सिफारिसमा यो कारबाही भएको हो।
कालोसूचीमा राखिएका कम्पनीहरूले तोकिएको अवधिसम्म सार्वजनिक निकायको कुनै पनि खरिद कारबाहीमा भाग लिन पाउने छैनन्। कार्यालयका अनुसार सूचना प्रकाशित भएको मिति अर्थात् माघ २९ गतेदेखि नै यो प्रतिबन्ध लागू भएको छ। निर्माण कार्यमा ढिलासुस्ती गर्ने र सर्त पालना नगर्ने व्यवसायीहरूलाई निरुत्साहित गर्न यो कदम चालिएको कार्यालयले जनाएको छ।
हेर्नुहोस् सूचना
