काठमाडौँ । मनसुनी वायुको निरन्तर प्रभावका कारण आज (शनिबार) देशभर अधिकांश बदली रही पश्चिमी तथा मध्य क्षेत्रका विभिन्न भू-भागमा मध्यमदेखि भारी वर्षाको सम्भावना रहेको मौसम पूर्वानुमान महाशाखाले जनाएको छ। महाशाखाका अनुसार गण्डकी, लुम्बिनी, कर्णाली र सुदूरपश्चिम प्रदेशको हिमाली तथा पहाडी भेगका अधिकांश स्थान र कोशी तथा बागमती प्रदेशका धेरै स्थानमा मेघगर्जन र चट्याङ्गसहित मध्यमसम्मको वर्षा तथा उच्च हिमाली क्षेत्रमा हिमपातको सम्भावना रहेको छ।
दिउँसोको समयमा गण्डकी, लुम्बिनी, कर्णाली र सुदूरपश्चिम प्रदेशका थोरै स्थानमा भारीदेखि धेरै भारी वर्षाको चेतावनी दिइएको छ। यसैगरी लुम्बिनी र सुदूरपश्चिमका तराई भू-भागका अधिकांश स्थान तथा मधेश, कोशी, बागमती र गण्डकी प्रदेशका तराई क्षेत्रमा मेघगर्जनसहित मध्यम वर्षा हुनेछ। विशेषगरी मधेश प्रदेशसहित कोशी, बागमती, गण्डकी र लुम्बिनी प्रदेशका तराई भू-भागका केही स्थानमा तीव्र गतिको हावाहुरी चल्न सक्ने भएकाले सतर्क रहन आग्रह गरिएको छ।
रातिको समयमा पनि बागमती, गण्डकी, लुम्बिनी, कर्णाली र सुदूरपश्चिम प्रदेशमा अधिकांश बादल लाग्ने र धेरै स्थानमा वर्षा कायमै रहनेछ। राति गण्डकी, लुम्बिनी, कर्णाली र सुदूरपश्चिम प्रदेशका थोरै स्थान तथा बागमती प्रदेशका एक-दुई स्थानमा भारीदेखि धेरै भारी वर्षाको जोखिम छ। लगातारको वर्षाका कारण पहाडी भेगमा पहिरो जाने, खोलानाला तथा नदीहरूमा जलसतह बढ्ने र तराई क्षेत्रमा डुबानको समस्या निम्तिन सक्ने भएकाले महाशाखाले आवश्यक सतर्कता अपनाउन सबैमा अनुरोध गरेको छ।
