काठमाडौँ । रसुवा र केरुङ सीमा क्षेत्रमा हालै आएको विनाशकारी पहिरो र बाढीले चिनियाँ राष्ट्रपति सी चिनफिङको महत्त्वाकांक्षी ‘हिमालयन करिडोर’ पूर्वाधार रणनीतिमाथि गम्भीर भौगोलिक तथा वातावरणीय चुनौती खडा गरिदिएको छ।
चीनले तिब्बतको दक्षिणी सीमामा ६२८ वटा ‘सीमा गाउँ’ निर्माण गरी केरुङ हुँदै नेपालको राजधानी काठमाडौँ जोड्ने रेलमार्ग र व्यापारिक मार्ग विस्तार गर्ने योजना अघि सारेको थियो। तर, हिमालयी क्षेत्रको अत्यन्तै संवेदनशील र जटिल भूगोल, निरन्तरको भूकम्प, पहिरो, बाढी र जमेको जमिन (पर्माफ्रोस्ट) पग्लिने समस्याका कारण चिनियाँ इन्जिनियरिङ क्षमता र बहुअर्ब डलरका परियोजना जोखिममा परेका छन्।
नेपाल खण्डमा मात्रै ७२ किलोमिटर रेलमार्ग निर्माण गर्न ४ अर्ब ५० करोड अमेरिकी डलर लाग्ने अनुमान गरिएको छ। भौगोलिक विकटता र प्राकृतिक विपद्का कारण हङकङबाट प्रकाशित साउथ चाइना मर्निङ पोस्ट र विश्लेषकहरूले सीको यो महत्त्वाकांक्षी व्यापारिक तथा रणनीतिक सञ्जालमाथि प्रश्न उठाएका छन्।
