काठमाडौँ । राष्ट्रिय स्वतन्त्र पार्टी (रास्वपा) ले केन्द्रीय समितिको बैठक आह्वान गरेको छ। पार्टी सभापति रवि लामिछानेले आगामी बुधबार बिहान ९ बजे पार्टी केन्द्रीय कार्यालय वनस्थलीमा बस्ने गरी उक्त बैठक बोलाएका हुन्।
पार्टी प्रवक्ता मनिष झाका अनुसार यो बैठकमा मुख्यगरी रास्वपाको प्रथम राष्ट्रिय महाधिवेशनको सम्बन्धमा विस्तृत छलफल हुने कार्यसूची रहेको छ। रास्वपाले आफ्नो साङ्गठनिक संरचनालाई थप मजबुत बनाउन आगामी भदौ वा असोज महिनाभित्र पहिलो महाधिवेशन सम्पन्न गर्ने लक्ष्य राखेको छ।
बैठकमा महाधिवेशनको तयारीका साथै अन्य समसामयिक राजनीतिक विषयहरूमा पनि छलफल गरी आवश्यक निर्णयहरू लिइने प्रवक्ता झाले जानकारी दिएका छन्। पार्टी स्थापना भएको छोटो समयमै पहिलो महाधिवेशन गर्न लागेकाले यस बैठकलाई महत्त्वका साथ हेरिएको छ।
