काठमाडौँ । सङ्घीय संसद् अन्तर्गत प्रतिनिधिसभाको बैठक आज बुधबार बिहान ११ बजे बस्दै छ। संसद् सचिवालयले सार्वजनिक गरेको दैनिक कार्यसूची अनुसार आजको बैठकमा आर्थिक वर्ष २०८३/०८४ को सरकारको वार्षिक नीति तथा कार्यक्रममाथि छलफल सुरु हुनेछ। प्रधानमन्त्री बालेन्द्र शाहले राष्ट्रपति रामचन्द्र पौडेलद्वारा प्रस्तुत उक्त नीति तथा कार्यक्रममाथि छलफल प्रारम्भ गरियोस् भनी प्रस्ताव प्रस्तुत गर्ने कार्यक्रम रहेको छ।
बैठकमा सांसदहरूले नीति तथा कार्यक्रममाथि प्राप्त भएका संशोधनहरू प्रस्तुत गर्नेछन् र ती विषयहरूमा सदनमा विस्तृत छलफल हुनेछ। छलफलका क्रममा सांसदहरूले उठाएका प्रश्न र जिज्ञासाहरूको आजै प्रधानमन्त्री बालेन्द्र शाहले जवाफ दिने कार्यसूची तय गरिएको छ। प्रधानमन्त्रीको जवाफपछि प्राप्त संशोधनहरूलाई निर्णयार्थ प्रस्तुत गरिने र अन्त्यमा सभामुखले नीति तथा कार्यक्रमलाई निर्णयार्थ प्रस्तुत गर्ने प्रक्रिया रहेको छ।
यसअघि गत सोमबार राष्ट्रपति रामचन्द्र पौडेलले सङ्घीय संसद्को दुवै सदनको संयुक्त बैठकमा आगामी आर्थिक वर्षको नीति तथा कार्यक्रम प्रस्तुत गरेका थिए। संसद् सचिवालयका महासचिव पद्मप्रसाद पाण्डेयद्वारा जारी कार्यसूचीमा उल्लेख भए अनुसार आजको बैठकले नीति तथा कार्यक्रमलाई पारित गर्ने प्रक्रिया अघि बढाउनेछ। संसद्को यस महत्त्वपूर्ण बैठकलाई राजनीतिक वृत्तमा निकै चासोका साथ हेरिएको छ।
