काठमाडौँ – भान्छामा पाकेको खाना तातो राखिराख्न वा भण्डारण गर्न आल्मुनियम फोइलको प्रयोग सामान्य मानिन्छ। तर, खाद्य सुरक्षा विज्ञका अनुसार सबै प्रकारका खानेकुरा आल्मुनियम फोइलमा बेरेर राख्नु स्वास्थ्यका दृष्टिकोणले सुरक्षित हुँदैन।
केही खानेकुरा आल्मुनियम फोइलमा राख्दा रासायनिक प्रतिक्रिया भई धातुका साना अंश खानामा मिसिन सक्छन् भने कतिपय अवस्थामा जीवाणुको सङ्क्रमण तीव्र हुने जोखिम रहन्छ।
विज्ञका अनुसार आल्मुनियम फोइलमा कहिल्यै राख्न नहुने खानेकुरा:
तातो खानेकुरा: पाकेलगत्तैको तातो खाना आल्मुनियम फोइलमा बेरेर राख्दा हावा छिर्न पाउँदैन र ब्याक्टेरिया छिटो फैलिन मद्दत गर्छ।
अमिला खानेकुरा वा गोलभेडा: एसिडले आल्मुनियमसँग रासायनिक प्रतिक्रिया गर्छ, जसका कारण धातुका सूक्ष्म कण खानामा पस्न सक्छन्।
कागती तथा अमिला फलफूल: अमिला फलफूल काटेर आल्मुनियम फोइलमा बेर्दा रासायनिक प्रतिक्रिया हुन्छ।
धेरै नुनिला खानेकुरा: नुनको मात्रा बढी भएका सुकुटी, अचार, वा बढी मसलादार खानाले फोइललाई चाँडै खियाउँछ।
चिज: फोइलमा कडासँग बेर्दा ओस थुनिएर चिजमा ढुसी लाग्ने वा चाँडै बिग्रिने सम्भावना हुन्छ।
भिनेगर युक्त खानेकुरा: सिरका प्रयोग गरेर बनाइएका खानेकुरा फोइलमा राख्दा प्याकेजिङ बिग्रिनुका साथै स्वादमा पनि परिवर्तन आउँछ।
तारेको आलु: पाकेको आलुलाई तातो राखिराख्न फोइलमा बेरेर छाड्दा कम अक्सिजन भएको वातावरण बन्छ र हानिकारक ब्याक्टेरिया हुर्कन सक्छन्।
